Timor-Leste no Portugal asina Memorandu Entendimentu iha Jenebra iha área saúde

Nota ba Imprensa

Dr, Paulo Moita de Macedo no Dr. Sergio Gama Lobo SpB.,
molok asina hotu Memorandu Entendimentu (19.05.2014)

Jenebra, 19 Maiu 2014. Timor-Leste no Portugal asina Memorandu Entendimentu iha área saúde bainhira rai rua ne´e partisipa hamutuk iha Asembleia Mundiál ba Saúde iha Jenebra. Delegasaun husi Timor-Leste ne´ebé xefia husi Dr. Sergio Lobo, SpB., konvida ninia kontraperte husi Portugal, Dr, Paulo Moita de Macedo, atu mai vizita Timor-Leste durante Simeira be CPLP be sei hala´o iha fulan Jullu oin mai. 

Dr. Sergio Lobo, SpB., mos simu konvite ba vizita Portugal hodi bele hametin liu tan koprasaun entre Timor-Leste no Portugal, liu liu iha área emerjénsia. Timor-Leste sei servisu hamutuk ho INEM ka Instituto de Emergência Médica de Portugal. Timor-Leste sei aproveita mos haree instalasaun fasilidade saúde oin oin no instalasaun farmaseútika. 

Durante Simeira CPLP ne´e, Timor-Leste no Portugal buka atu formaliza koperasaun ida ne´e. Koperasaun ho Portugal sei haree liu liu ba saúde inan no oan no nutrisaun. Portugal foin lais destaka tama ba rai sanulu iha mundu tomak ne´ebé seguru liu ba neo-natál (kosok-oan ho to´o loron 28) sira atu moris ba; no ba mortalidade iinfántil (labarik to´o tinan lima) Portugal hanesan rai ida ke diak liu iha mundu mos ho taxa kiik tebes. Maske Timor-Leste konsege ona hamenus taxa mortalidade infántil, sei iha área barak mak ita presiza atu hadian ba sai diak liu tan. 

Liu husi INEM, Portugal sei haruka espesialista ba emerjénsia médika mai Timor-Leste. Ho objetivu atu hadian organiza servisu emerjénsia iha Timor no sei identifika mos área saida deit mak nesesita formasaun. Área sira ne´ebé Timor-Leste hakarak atu hetan kapasitasaun mak hanesan kapasitasaun iha área médiku no paramédiku Timor-oan sira iha Portugal. 

Iha Simeira ida ne´e mos sei halo koperasaun iha área ai-moruk. Portugal prontu atu haruka tékniku sira iha área aprovizionamentu no regulamentasaun ai-moruk mai Timor. Portugal sei hein atu Timor-Leste defini termu referénsia no kondisaun servisu. Portugal liu husi estende mos apoiu iha regulamentasaun setor privadu saúde iha Timor-Leste.



_______________________________________________________________
Ba informasaun barak liu tan bele kontakta:
Misliza Vital
Xefe Departamentu Komunikasaun no Protokolu
Ministériu Saúde RDTL
Tlmv: (+670) 781 791 26



@cc