Diskursu Sua Exelésnia Ministru Saúde hodi loke ofisialmente Asembleia Nasionál  Cruz Vermelha Timor-Leste (CVTL)

31 Jullu 2014, iha Hotel The Ramelau

Sra. Kathryn Clarkson, Dr. Sergio Lobo, SpB.,
Dr. Benjamin Corte-Real no Sr. Drew Penland
iha sesaun abertura asembleia, 31/7/2014.
Foto@Carinton Salazar

Excelentisma senhora Kathryn Clarkson, Xefe Delegasaub IFRC

Excelentisima Senhora Drew Penland, Xefe Delegasaun ICRC

Exelentisimu Dr. Benjamin Corte-Real, Prezindenti CVTL

Membru Asembleia, Konvidadu, Senhor no senhora sira

Ho laran ksolok tebes ha´u marka ha´u-nia prezensa iha abertura Asembleia Nasionál CVTL ida ne´e.

Maske sosiedade Cruz Vermelha Timor-Leste nian foin mak harii iha tinan 2000, Cruz Vermelha ninia prezensa iha Timor-Leste naruk liu tan ida ne´e no sasin mós ba istória Timór nian. Hanesan líder mundial ida iha Primeiro Socorro, Cruz Vermelha ninia servisu iha Timór belar liu tan ida ne´e hodi fo mós apoiu umanitáriu ba populasaun sira ne´ebé vulnerável liu bainhira Timór foin mak prepara-aan ba ukun aan.

Hanesan Ministru Saúde, naturalmente ke ha´u aponta ba área servisu barak entre Cruz Vermelha no Ministériu Saúde ne´ebé mak transversal liu liu iha área ´primeiro socorro´, saúde iha tempu emerjénsia no dala ida tan HIV/SIDA, saúde inan no oan no seluk tan. Ita sei buka hamutuk oinsa ita bele hasa´e konsiensia saúde iha komunidade sira nia let. Hodi nune´é ita hotu bele sai vanguarda iha edukasaun no prevensaun moras.

Ha´u fiar CVTL ninia servisu ne´ebé buka mós atu alkansa populasaun joven Timoroan sira liu husi Asembleia Nasionál Juventude nian. CVTL sei bele rekolle no fahé ideia sira husi joven sira ne´e kona-bá oinsá CVTL bele hatan ba necessidade sira ne´e no ajuda mós CVTL ninia desizaun ba oin. Ho taxa idade joven ne´ebé aas iha Timor-Leste, CVTL ninia área servisu ne´ebé abranje to´o ba HIV/SIDA importante tebes atu hetan apoiu husi ita hotu.

Ho assembleia ida ne´e ita bo´ot sira sei elege membru foun ba Konsellu Diretivu Nasionál. Hodi bele trasa diresaun foun ba futuru tuir saída mak komunidade vulnerável sira presiza liu no oinsa bele hatan ba rai joven ida ne´ebé nakonu ho joven mós.

Obrigadu,

Abertura Asembleia Nasionál Cruz Vermelha Timor-Leste

cc 0

Read More

Iha ala VVIP ne´ebé Ospitál Guido Valadares prepara
ba simu eventual sira ne´ebé bele mosu durante
Simeira ba dala X CPLP. (23.07.14)

Dili, 23.07.14 - Iha ámbitu Simeira ba dala X Xefe Estadu CPLP, Ministru Saúde Portugal integra mós ba delegasaun ne´ebé mai Timor-Leste. Paulo Moita Macedes,Ministru Saúde postugés,  Francisco George, Diretór Jerál ba Saúde no Luis Vitório  nu´udar Xefe Gabinete ba Ministru halo vizita badak ida ba Ospitál Nasionál Guido Valadares iha loron ikus Simeira ne´e nian. Vizita ida ne´e mós sei marka ho asinatura Memorandu Entendimentu ida iha área farmásia no servisu ambulánsia.

Diretór foun Ospitál Nasionál Guido Valadares, Dr. José António Gusmão Guterres , simu bainaka sira ne´e hodi fo informasaun en jerál kona-ba servisu ospitál, apoiu husi rai parseiru sira hanesan Cuba, Austrália, Xina no seluk tan no difikuldade sira ne´ebé ospitál hasoru.  Ministru Saúde hamutuk ho Vise Ministra na´in rua no Diretór Jerál Saúde hamutuk ho doutor no enfermeiru sira hamaluk no hatudu ala espesiál va VVIP ne´ebé ospitál prepara, ala maternidade, enfermária Kuidadu Intensivu no ikus liu sala emerjénsia nian mós.

Governu portugés hakarak atu hametin liu tan koperasaun entre rai rua ne´e liu liu iha área saúde. Ministru Saúde portugés, Dr. Paulo Moita Macedes, bainhira rona kona-ba taxa natalidade iha ospitál Guido Valadares, nia hatan dehan " Ida ne´e númeru ida ke diak tebes bainhira kompara ho Portugal, maske aas ba Timor-Leste". Portugal hanesan mós ho rai dezenvolvidu sira seluk ne´ebé enfrenta problema ho taxa natalidade ne´ebé negativu. Ema barak iha Portugal buka atu iha oan ho otas ne´ebé bo´ot liu ona tamba hotu hotu buka atu servisu uluk lai. Ida ne´e problema ida bainhira númeru ferik no katuas sira barak liu fali otas foin sa´e sira, no afeta setór hotu hotu iha rai laran liu liu iha área ekonómia.

Dr. José António agradese vizita badak ne´e hodi bele hatudu rasik saida mak ospitál agora iha no halo dadaun. Memorandu Entendimentu ida ne´e sei asina hamutuk iha Palácio do Governo ho prezensa Primeiru Ministru husi Portugal, Pedro Passos Coelho no Timor-Leste, Xanana Gusmão iha área regulamentasaun ai-moruk no kriasaun sistema emerjénsia médika pre-ospitalár. Akordu sira ne´e hanesan pasu istóriku ida entre rai rua ne´e iha área saúde.








 

Ministru Saúde portugés vizita Ospitál Nasionál Guido Valadares

cc 0

Read More

Loron 11 de Julho 2014, tuku 11.00 oras Timor Leste Iha Ilha Atauro, Ministériu da Saúde hakerek tan istoria ida iha nia Governasaun nia Laran hodi halo inagurasaun ba aerodromo Ilha Atauro , iha Biban ida ne`e Ministru da Saúde Dr. Srrgio Gama Lobo; SpB hamutuk ho membru Governu Sira seluk hanesan: Reprsentante husi Komisaun F, Representante Obras Publiku, Representante Transporte e komunikasaun, Administrador Distritu Dili no Administrador Sub Distritu Atauro, Director Geral Ministériu da Saúde, Diretor Nasional Servisu Hospitalar, Diretor Nasional Recursu Humano,Diretora Servisu Saúde Distritu Dili, Liders Komunidade Atauro nian no Komuniadade hotu hamutuk hodi sai sasin ba Ceremonia Abertura ida ne’e nebe`e objetivo hodi hari air portu ida ne’e maka: atu hodi responde ba perkupasaun ne’ebé durante ne`e ita hotu hasoru liu-liu populasaun Atauru iha area tranferensia pasiente ne’ebé persija lalais ita nia tulun iha nivel Saúde ne’ebe aas liu ne maka Hospital nasional Guido Valadaders- Dili.

Iha Ceremonia inagurasaun ida ne’e hato’o mos husi ministru da Saúde katak Mds laran kontenti tebes mai hamutuk ho komunidade sira hotu atu halo inagurasaun ba Aerodromo Atauro nian ne’ebé la’os halo foun maibe re aktivu fila fali aerodromo atauro ida ne`e. iha diskursu nia laran Ministru da Saúde hato’o mos katak dalabarak tarde no atraja iha ro ahi tanba tengki hein to’o oras ida  nia laran no tasi nebe`e bo`ot bele  halo ema barak mak mate tanba kondisaun ida ne’e. 

tanba ne’e maka Ministériu da Saúde halo kontratu ho Aviaun ne’ebé husi Dili mai Atauro ne’ebe’ sei han deit 15 minutus ne’ebé ho Meia horas bele ona salva ema ida nia vida nebe`e presija. Iha biban ida ne`e ministru da Saúde hato`o mos katak agora dadauk Ministériu da Saúde sei preokupa tebes atu resolve problema Saúde iha timor laran tomak  tan ne`e Ministériu da Saúde sei hadiak kapasidade recurs rai laran nian atu nune`e bele resolve asuntu kiik nebe`e la presija atu lori ba Dili,hanesan moras balun nebe`e bele resolve deit iha Atauro, e Ministériu da Saúde mos  sei esforsu mos atu tau kondisaun nebe`e ideal ba iha centru Saúde atauro atu resolve problema barak ne’ebé mosu, atu hadiak kondisaun diak ba ita nia oan sira,no mos atu identifika antes problema mosu tanba dala barak tarde tiha ona maka ema haruka ba Dili.

MInistru da Saúde hatutan mos katak Ministériu da Saúde sei kria mecanismu ida atu halao tranferensia ida nebe`e diak tanba aviaun ida ne’ebé servisu hamutuk ho ita la dun karun.

Aproveita biban ida ne`e Dr. Sergio lobo hato`o mos katak Ministériu da Saúde sei labele halo buat ida no buat barak, ho oportunidade no apoio husi Primeiru Ministru, no komunidade tomak no lider sira nebe`e esforsa aan hodi mobiliza rekursu komunidade nian e fo mos agradese klean ba komunidade tomak ne’ebé fo sira nia rain atu halo prosesu dezenvolvementu iha ita nia rai e la haluhan Ministru hato`o mos agradese boot ba Ministériu Obras Pública ne’ebé responde ba preokupasaun Ministériu da Saúde nian – uja Recursu nebe`e iha hodi ateru / dudu rai ne`e.

Ministru rekoenese katak iha komunidade ida rua mak la dun satisfeitu maibe Ministériu da Saúde sei esforsu aan atu fo buat ne’ebéjustu hamutuk ho teras propriadades, Ministériu seluk no autoridade local sira.

Molok atu ramata diskursu ida ne’e ministru saúde hato`o liu tan katan Ministériu da Saúde sei presija nafatin ita hotu nia ajuda tanba ita nia Saúde iha ita nia liman rasik. kuandu moras mak la ba konsulta, ema ida sei la hatene ita nia moras, ita la proteje ita nia Saúde, uma laiha kondisaun ne’ebé saudavel, fuma sigaru lor-loron, mama malus, hemu tua  tanba ita nia Saúde la mai husi lalehan, ita hotu-hotu tenki esforsu aan. 

No ba dala ikus liu husi diskursu ida ne`e: dala ida tan Ministru da Saúde hato’o agradese ba partisipasaun komunidade tomak hodi apoio iha konstruksaun aerodromo ida ne’e, e ba oin ita sei kontribui diak liu tan ba dezenvolvementu atauro nian, la haluhan Ministru da Saúde mos hato`o agradese ba Mr. Jonathan nebe`e sai hanesan piloto ma aviaun Maf nebé sei servisu hamtutuk ho Ministériu da Saúde iha tranferensia pasiente nian. @Misliza#

Serimónia Inagurasaun aerodromu Atauro- Sub Distritu Atauro, Distritu Dili, Sesta,11 Julhu 2014

cc 0

Read More

Enkaregadu Negósiu embaixada EUA
iha Timor-Leste, Sr. ScottTicknor
hamutuk ho Vise Ministra EPS,
Natália de Araújo, Sps

08.07.2014.  Xefe Suku Railaco Leten hato´o agradese ua´in ba Ministériu Saúde, povu amerikanu liu husi forsa Navál Seabees, F-FDTL, ONG Hadi’ak, ba reabilitasaun Postu Saúde ne´ebé agora  prontu ona atu bele halo servisu atendimentu. Postu Saúde Railaco Leten bele kobre ba suku haat viziñu no importante liu mak komunidade sira ne´ebé mak agora dadaun iha Railaco Leten. Fasilidade no edifísiu ne´ebé ho kualidade diak tebes ne´e hanesan orgullu bo´ot ida ba ami no bele servi komunidade sira iha parte ne´e.

Entretantu Enkaregadu Negósiu Estadu Unidu Amerika iha ninia diskursu hatete katak, “Durante fulan tolu ka loron ualunulu resin rua forsa naval amerikanu servisu hamutuk ho ekipa engeñaria F-FDTL hala´o reabilitasaun ba Postu Saúde Railaco Leten ne´e hanesan servisu bo´ot no esforsu bo´ot ida. Parabens ba susesu signifikante ida ne´e ne´ebé hamriik hanesan kolaborasaun futuru hodi haree ba komunidade ka suku sira ne´ebé remota liu bele hetan atendimentu. Projetu ida ne´e hanesan projetu parseria ida ne´ebé susesu."

Forsa navál Seabees hamutuk ho engeñaria F-FDTL kolabora diak hodi bele harii konstrusaun ba sentru saúde ida ne´e no hetan rezultadu ida ne´ebé diak liu.  Maibé atu hadia diak liutan atendimentu no fasilidade ne´ebé iha sentru saúde ne´e nia laran hodi bele fó atendimentu ne´ebé diak liu. Ministériu Saúde, servisu saúde distritál, St. John of God health care, Hadiak tenki servisu hamutuk no kopera diak atu nune´e bele garante atendimentu diak ba populasaun.

Obrigadu ua´in ba engeñaria husi Seabees, F-FDTL, no parseira tomak nia apoiu hodi bele hadia kontrusaun husi pursentu 39 to´o pursentu 80. Iha tinan ne´e nune´é postu saúde ida ne´e bele servi knua lima ne´ebé besik. Importante liu mak hasa´e no hadia dadus atendimentu sira iha fasilidade ne´e nia laran.

Vise Ministra Saúde hatete katak, "...iha fulan Janeiru liu ba Ministériu Saúde hamutuk ho servisu saúde distritál Ermera realiza supervisaun suportivu hodi hala´o avaliasaun no hasa´e prontidaun ba fasilidade saúde oras 24  iha distritu Ermera." Husi falidade hirak ne´ebé existe iha Ermera so fasilidade ida deit mak fornese kualidade kuidade saúde ba komunidade tuir padraun Ministériu Saúde nian. Ho konkretu sentru saúde Gleno mak iha ninia komponente tomak kompletu no funsiona inklui abalidade ninia pesoál sira, ekipamentu, ai-moruk, konsumavél, eletrisidade, bee no infraestrutura ne´ebé mak adekuadu no servisu referál ne´ebé iha ligasaun diak ho lider komunidade diak no agora dadaun lao hela.

Vise Minstra hatutan tan, "Sentru saúde Gleno atinje ninia prontidaun hahu kedas iha tinan ida liu ba, obrigadu ba kolaborasaun ne´ebé fornese husi Forsa navál Seabees, F-FDTL, ne´ebé hadia infraestrutura no servisu saúde distritál ho parseiru São João de Deus no mos USAID no mos suporta husi projetu Hadi’ak kona-bá asisténsia tékniku hodi hadia jestaun kualidade servisu nian."

Susesu ida ne´e replika tiha ona ba fasilidade sira seluk iha Oecusse iha tinan 2013. No ohin ita selebra exemplu ikus iha Railaco Leten. Hodi hadia postu saúde ida ne´e durante halo supervizaun supertivu iha fulan Janeiru liu bá postu saúde Railaco Leten ninia valor menus. Difikuldade bo´ot ne´ebé postu saúde ne´e hasoru mak kondisaun infraestrutura ne´ebé aat, la iha eletrisidade, bee mos no saneamentu la dun diak, ekipamentu, skill husi pesoál saúde no sistema jestaun ne´ebé limitadu atu hadia durante fulan tolu Forsa Naval EUA servisu hamutuk ho engeñaria F-FDTL halao renovasaun tomak kona-bá uma, inklui infraestrutura, eletrisidade, atu hadia fornesimentu kuidadu saúde primária Ministériu Saúde, servisu saúde distritu no parseiru São João de Deus ho Hadi´ak servisu ho pesoál saúde hodi organiza sala, hodi organiza treinamentu no reforsa ligasaun ho komunidade, husi suku lima ne´ebé iha asesu ba suku Railaco Leten.

Servisu ne´e hatudu oinsa suporta husi parseiru oin oin mai iha Ministériu Saúde atu hadia prontidaun fasilidades saúde, infraestrutura fornese husi Forsa Navál Seabees no F-FDTL, kona-bá asisténsia tékniku fornese husi Ministériu Saúde, servisu saúde distritu apoiu husi HADI’AK, no São João de Deus Health Care. No mos involve nafatin xefe suku sira hotu hodi komplementa postu saúde Railaco Leten hodi atinje mínimu 80 %,  iha tinan ne´e.

Observasaun jornalista nota katak kontrusaun no fasilidades ne´bé mak agora dadaun iha Railaco Leten preparadu hodi halo atendimentu ba utente sira. Agora dadaun iha Postu Saúde Railaco Leten, iha asistente enfermeiru ida, doutor ida no bele ona halo servisu hanesan bain bain hanesan atendede nesesidade sira husi komunidade nian.




CS

Forsa Navál EUA Seabees, F-FDTL no ONG HADIAK termina reabilitasaun Postu Saúde Railaco Leten

cc 0

Read More

Ministru Saúde, Dr. Sergio Lobo no
Reitor UNTL, Prof. Dr. Aurélio Guterres,
asina akordu tékniku ba peskiza. 08.07.14

Dili, 08.07.14.  Ministériu Saúde asina akordu tékniku ho Universidade Nacional Timor Lorosa´e (UNTL)  ba ´National Survey on risk factors for Non-Communicable Disease using WHO STEPS Approach in Timor-Leste´  (ka ho tetun katak, ´Peskiza Nasionál kona-bá fator risku sira ba moras la-hadaet, hodi uza abordajen husi OMS STEPS iha Timor-Leste´). Akordu ida ne´e sei vigora ba tinan rua no sei bele hanaruk bainhira presiza.

Finansiamentu ba peskiza ida ne´e sei mai husi Ministériu Saúde ba durasaun akordu ne´e tomak ho montante totál dolar amerikanu $319,588.50. Ministériu Saúde sei mos fornsese la´os deit verba maibé apoiu ho dadus hotu hotu husi servisu saúde tomak iha Timor-Leste, fo mós ´Ethical Clearance´ ba ekipa ne´ebé sei hala´o projetu ne´e.

Tuir dadus husi Organizasaun Mundiál ba Saúde (OMS), katak moras la-transmisível oho ema millaun 36 tinan tinan iha mundu tomak. 80% husi ema sira be mate ne´e mai husi rai sira ho rendimentu médiu no kiik, ba sa Timor-Leste mos tama ba lista ida ne´e. Ema ne´ebé mate tamba moras la-transmisível ne´e akontese ho idade antes 60, no 90% husi ema ne´ebé mate dala ida tan mai husi rai sira ho rendimentu médiu no kiik.

Prof. Dr. Aurélio Guterres, nuudar Reitór UNTL hatete iha serimónia badak ne´e katak, "projetu ida ne´e hanesan knaar importante ida universidade, no ninia rezultadu bele aplika iha moris lorloron no lori diak ba sidadaun tomak, instituisaun sira no liu liu ba umanidade." Parte husi Fakuldade Medisina UNTL nian mak sei exekuta peskiza ne´e. Ho ekipa na´in 30 resin ne´ebé integra ba hala´o projetu bo´ot ida, Reitór UNTL haklekan tan katak "...ekipa tenki halo peskiza tuir prazu atu labele empata projetu."

Moras sira be konsidera hanesan moras la-transmisível ka la hadaet, koñesidu mos ho termu moras króniku. Dala barak moras ne´e ninia progresu neneik no naruk hanesan moras kardiovaskulár sira, kankru, moras respiratóriu no mos diabetes.  Iha peskiza husi ´Global Adult Tobacco Survey´ no ´Global Youth Tobacco Survey´(Peskiza Globál ba Adultu no Joven ne´ebé Fuma) iha fulan Setembru liu ba, hatudu katak Timor-Leste hanesan rai ida ne´ebé iha prevalénsia fuma tabaku ida ke aas liu iha mundu tomak. Timor-Leste, tuir peskiza ne´e, iha prevalénsia 60% husi populasaun tomak no mós prevalénsia ass liu ba joven ne´ebé fuma tabaku. Husi númeru sira ne´ebé hatudu ne´e maioria fumadór sira mesak mane deit. Husi fuma tabaku, ladun halo atividade fizíka, han hahan la saudável no mos hemu alkool barak liu hasa´e risku ka kauza ba moras sira ne´ebé relasiona ho moras la hadaet ne´e.

Akordu ida ne´e sei viza fo informasaun ne´ebé diak liu tan kona-ba hahalok moris populasaun nian ne´ebé relasiona ho fatór risku moras la-transmisível sira. Ho dadus ne´ebé sei rekolla sei hatudu oinsa polítika saúde nian bele foti medidas preventivu ba problema sira ne´ebé relasionadu no atu sai mós husi programa sira en foque hela hanesan saúde ba inan no oan.

@CC

UNTL sei halo Peskiza Nasionál ba fatór risku moras la-hadaet

cc 0

Read More

Vizita Ospitál Referal Maubise
04.14.14. Foto@Carinton Salazar

Ospitál Reférensia Maubisse iha Diretor na´in rua, Xefe Departamentu na´in tolu, ida agora dadaun hala´o hela estudu iha Semarang, dentista ida, analista hitu, ida ba estudu iha rai liur, ida la tama servisu fulan lima ona no ami kansela ona ninia saláriu. Farmásia iha na´in tolu nain rua deit mak ativa, ida fali la tama servisu durante fulan neen ona ne´e mos parte ospitál nian halo ona kanselamentu ba ninia saláriu.

Anestezia iha rua deit maibé kontinua hetan ajuda husi Brigada Medica Cubana,  téknika matan ida, raiu-x ida Timor-oan agora prepara hela atu ba eskola kuandu nia ba eskola normalmente ami sei la iha tan tékniku raiu-x, fizioterapista ida, nutrisionista ida, tékniku biomédiku ida, tékniku saúde ambientál ida, tékniku medical record ida, maibé agora dadaun nia kontinua hela ninia estudu. Asistente enfermeiru iha na´in neen, motorista operasionál rua, motorista ambulánsia ida, tékniku administrativu rua, ofisiál planeamentu ida, lojístika ida, tékniku eletrisista na´in haat, iha tékniku ida husi Global Fund. Total hamutuk pesoál 79 mak agora dadaun halo knaar iha Ospitál Referal Maubisse.

Agora dadaun klínika São Joaquim la iha ambulánsia tamba ne´e ospitál mak ba tula moras ka pasiente hirak ne´ebé atu hetan tulun mai Ospitál Reférensia rasik ka enkamiña ba Ospitál Nasionál Guido Valadares. Kona-bá ai-moruk agora dadaun sufisiente hela iha Ospitál Reférensia Maubisse hodi bele halo atendimentu normal.

Operasaun barak liu ne´ebé akontese iha Ospitál Reférensia Maubisse mak sezariana. Agora dadaun problema be Ospitál Reférensia Maubisse hasoru mak jeradór la dun funsiona ho diak, agora dadaun Ospitál Reférensia Maubisse kontinua servisu makaas mesmu ho kondisaun balun ne´ebé la dun favorável.

Kona-bá stok ai-moruk iha Ospitál Reférensia Maubisse agora dadaun la´o normal hela tanba husi ospitál rasik utiliza hela fundu external ne´ebé sira simu hodi bele halo kompras urjénsia ba ai-moruk sira iha klínika kuandu ai-moruk la iha hodi halo atendimentu.




Textu CS

Brigada Medica Cubana maubisse

Situasaun atuál Ospitál Referál Maubisse

cc 0

Read More