Kombate Tabagismu iha Timor-Leste - Proposta Lei prontu ona

Dili 24.9.2014 - Kombate tabagismu iha Timor-Leste hanesan dezafiu bo´ot ida la´os deit ba Ministériu Saúde maibe ba sidadaun ida ida mós. Tabaku ninia impaktu ba moras la hada´et iha Timor-Leste presiza hetan foku no diskute. Presiza nota katak esforsu sira ne´ebe halo durante tinan hirak ikus mai konsege hatuun moras hadaet sira malária ne´ebé hetan elójiu internasionalmente. Maibé, moras hadaet hanesan moras kardiovaskulár, kankru, moras respirasaun króniku (moras obstrusaun pulmonár króniku no asma) no mos diabetes mellitus sa´e ba bebeik.

Proposta lei ba kontrola tabaku ne´e importante bainhira ita haree ba númeru vítima ne´ebé sa´e ba bebeik. 30% husi pasiente ne´ebé baixa iha ospitál mate tamba moras la hadaet. Nia impaktu ne´ebé devastante ba familia no mos ba komunidade ne´ebé ema ne´e hela ba. Iha nivél globál epidemia tabaku hamate fumadór na´in millaun 6, no hamate mos fumadór pasivu na´in rihun 600. Tabaku tama ba grupu haat fator risku moras la hada´et ne´ebé iha risku to´o 20% ba pasiente ho moras tuberkuloze.  Se la iha medida preventivu epidemia ida ne´e sei hamate ema milliaun 8 tinan tinan iha mundu tomak. 

69.5% mane Timor ho idade 18 ba leten fuma. Indikadór alarmante ba prevalénsia ida ne´e importante atu ita hotu haree no uza estratéjia hotu hotu atu bele kombate no hamenus númeru ida ne´e. Tamba iha estudu ida ne´ebé hetan rezultadu ida ne´e (DHS 2009), hatudu mos katak prevalénsia atu adolesente sira kaer no fuma tabaku sa´e ba bebeik mós. 50.6% mane no 17.3% feto adolesente ne´ebé fuma tabaku.

Proposta lei ida ne´e defini kona-ba limitasaun konsumu tabaku, kompozisaun no medisaun substánsia sira be iha sigaru ida nia laran, mensajen saida deit mak tenki hakerek iha embalajen sigaru nian, oinsa bele faan sigaru, bandu mos publisidade promosaun no patrosiniu produtu tabaku nian, iha mos medida prevensaun sira ba tratamentu no kontrolu tabagismu no ikus liu no importante tebes rejime sansionáriu hodi defini koima no fiskalizasaun. Iha fulan Outubru oin mai proposta lei ne´e sei hatama ba Konsellu Ministru hodi bele diskute no aprova ba hatama ba Parlamentu Nasionál hodi aprova.





@cc