Ministru Saúde sorumutu ho Vise Primeiru Ministru

10/10/2014 - Sorumutu iha Palácio Governo
Vise Primeiru Ministru, Fernando Lasama de Araújo
no Ministru Saúde, Dr. Sergio G.C. Lobo, SpB.

Iha loron 10 fulan Outubru liu ba Dr. Sergio G.C. Lobo, SpB., hasoru malu ho Vise Primeiru Ministru, Fernando Lasama de Araújo hodi fo relatóriu kona-ba lalaok saúde iha Timor-Leste. Akompaña mos ho Dra. Inês Teodora de Almeida no Dr. Herculano Seixas.

Ministru Saúde ko´alia fo briefing kona-ba bolseiru sira husi Ministériu Saúde ne´ebé balun tuir ezame no desizaun ba sira be tuir no sira ne´ebé la tuir. 

Ho prazer Dr. Sergio hato´o mos sertifikadu exelénsia ne´ebé simu husi Organizasaun Saúde Mundiál. Timor-Leste sai hanesan rai ida ne´ebé konsege hatun taxa malária iha tempu badak nia laran. Susesu ida ne´e hetan ho servisu la para husi tékniku no profesionál saúde tomak. La haluha mos ba kompromisu ne´ebé lideransa saúde sira iha ba hadian saúde sidadaun ida ida iha Timor-Leste. 

Ministru Saúde mos ko´alia kona-ba exelénsia ida tan iha área pólio. Timor-Leste agora livre husi moras pólio grasa ba partisipasaun husi populasaun tomak. Eradikasaun moras pólio ne´e dehan hanesan susesu ida bainhira haree ba dadus tinan 10 ikus mai, ne´ebé la iha pólio liu kazu 10 iha tinan 1 ninia laran.

·                  Tópiku ida ne´ebé Timor-Leste hetan mos atensaun husi mundu internasionál iha sentidu negativu - tabaku. Atensaun negativu ida ne´e mai husi estudu ida ne´ebé katak konsumidór tabaku iha Timor-Leste mak aas liu iha mundu. Preokupante tebes bainhira númeru husi estudu ne´e hatudu katak labarik ho tinan 15 deit fuma sigaru hanesan buat baebaen ida. Ministériu Saúde sei halo esforsu hotu kedas ba halo kampaña hasoru tabagismu iha Timor-Leste. No ida importante tebes mos mak Lei anti-Tabaku ne´ebé Ministériu Saúde halo ona sei hatama ba Konsellu Ministru iha semana iad ne´e mos.

·        s    Ministru Saúde mos realsa katak kolaborasaun husi Ministériu seluk hanesan Obras Públika importante tebes. Importante tamba fasilita servisu saúde ninia prestasaun ba sidadaun siraa, hanesan instalasaun aeroportuáriu sira iha área remota hanesan Soibada no Barique. Instalasasun aeroportuária ne´e sei ajuda komunidade sira atu bele hetan asisténsia saúde emerjénsia lalais liu bainhira kompara ho kareta ne´ebé dura oras 8 atu to´o mai Dili.

Agora dadun aviaun husi MAF mak ajuda fo asisténsia médika. Ministériu Saúde kontratata MAF ba tinan 1 ($50.000/tinan) no bele asesu ba aeroportu Lopalos, Baucau, Same, Ainaro, Suai no Atauro. Iha Viqueque mos iha aeroportu maibé ninia kondisaun la dun diak. 

@cc