Depresaun

Dezeñu husi Albercht Durer kona-ba
´Melankólia´

Sentimentu tristeza, hirus no frustrasaun mak hanesan karater ba moras psíkika ida ne´e.

Ohin loron mundiál ba moras mentál, hodi marka loron ida ne´e ita bele lee hitoan kona-ba depresaun. Buat ida ke ita lee no rona barak iha média sosiál sira no iha ita-nia kolega ka familia sira nia let. Hodi nuune´e ita bele komprende diak liu tan no bele ajuda sira ne´ebé mak sofre depresaun hodi hetan moris ida ke diak liu tan. 

Depresaun iha tipu barak, liu liu depresaun todan, kaman no krónika, atípika, pós-partu, pré-menstruál no sazonál ka tuir nia tempu. Nia sai hanesan distúrbiu ida ba ita-nia estadu ánimu hodi halo ita sente triste, lakon, hirus no nia interefere iha ita-nia moris lorloron durante tempu naruk

Moras ne´e bele mosu husi situasaun estresante ida hanesa mate membru família nia, ka deziluzaun ka hirus. No moras ne´e mos bele provoka husi uzu droga no alkól no sai aat liu tan bainhira ita prolonga.

Sintomas sira ne´ebé baibain akompaña mak hanesan insónia ka toba la dukur/ la diak, haan gostu la iha, la iha konsentrasaun bainhira estuda ka lee, sente iritadu hela deit, la dun fiar-aan, sente ba hanesan moris la diak no hanoin atu oho-aan. Tratamentu ne´ebé doutór sira fo mak kombinasaun ai-moruk anti-depresaun no mós terapia psikolójiku. Ba iha kazu todan dala barak ema ne´e tenke interna iha ospitál.

Maibé ida importante mos atu ita hotu hatene mak oinsa ita bele prevene atu la bele tama ba depresaun laran. Iha meiu oin oin atu ita hadook-aan husi tristeza klean ne´e hanesan ita kuidadu ho ai-haan ne´ebé ita haan. Doutor sira rekomenda atu haan ai-haan ne´ebé riku ho ásiku mokur omega-3 (ikan salmaun) no ásidu fóliku husi modo tahan modok, ai-fuan, mantolu no mos ai-fuan maran balun. Diak liu ita hadook-aan husi abuzu droga no alkól no kualker droga psíkoativa no mos ganja.

Importante atu manten ita-nia isin saudavél hodi halo exersísiu barak, hodi bele ajuda ita toba diak no ita bele mos hahú haree téknika alternatovu barak hanesan yoga, meditasaun, ka exersisiu hanesan tai chi. Hodi nune´e ita la bele hadoo-aan husi kolega no familia sira tamba moras ne´e halo ita triste hela deit no ema barak la komprende tamba sa mak ita sente hanesan ne´e.