Profesionál saúde na´in 5 halo treinu preparasaun ba moras Ébola iha Jakarta

Médiku timoroan sira ne´ebé halo treinamentu
kona-ba oinsa uza EPP/PPE (Ekipamentu Protetivu Pesoál)
iha Sala Treinamentu Ospitál Nasionál Guido Valadares

Dili, 17/10/2014 - Profesionál saúde na´in 5 ba Jakarta hodi halo treinamentu preparasaun eventualidade ba hasoru pandemia moras Ébola iha Timor-Leste. Sira na´in 5 ne´e, na´in 2 husi pontu entrada fronteira iha Batugade, no na´in 3 husi Dili (1 husi Sentru Saúde Distritu Dili no 2 husi Ospitál Nasionál Guido Valadares).

Preparasaun ba eventualidade ne´e halo parte ba Planu Kontinjénsia ne´ebé foin lais reativa bainhira Organizasaun Saúde Mundiál hasai alerta ba Emerjénsia Saúde Públika ba mundu tomak. Timor-Leste prepara-aan dadaun atu enfrenta se karik moras ne´e mai to´o Timor. Ho koperasaun ho Organizasaun Saúde Mundiál ne´ebé fo apoiu ativu ba Ekipa Kontrolu Moras Surtu - iha kazu ida ne´e Moras Ébola, populasaun labele hakfodak maibé tenki manten vijilánsia atu bele hatene saida mak tenki halo se karik hetan ka hatene ema ruma /suspeita hetan moras Ébola.

Tuir Organizasaun Saúde Mundiál (OMS), liu husi Sr. Jeremias da Cruz hatete katak Timor-Leste ninia risku atu hetan moras mortál  ida ne´e kiik. Maske kiik la hases atu OMS Timor-Leste no Ministériu Saúde reativa no prepara-aan dadaun. Importante liu tuir nia hatete tan ´Ita la bele tauk, la bele pániku, maibé, ita tenki manten informadu´.

Presiza atu ita hotu hatene katak moras ida afeta uluk sira be iha primeira liña hanesan médiku no enfermeiru sira. Tamba profesionál saúde sira ne´e mak iha kontaktu besik liu ho ema ne´ebé moras. Tuir kedas mos familia sira ne´ebé besik ho ema ne´ebé infetadu hetan risku aas atu Ébola bele hada´et ba.

Ministériu Saúde liu husi blog ida ne´e no mós husi pájina iha Facebook, Twitter no G+, TVTL, portál SAPO.TL no média sira seluk hanesan jornál no rádio, sei fó sai informasaun ne´ebé públiku presiza hatene.




@cc