Timor Leste sai membru Komité Jerál hodi Reprezenta Rejiaun Sudeste Aziátiku iha Asembleia Mundiál Saúde 2014

Jenebra, 19 Maiu 2014

Asembleia Mundiál Saúde 67 loke iha loron ohin ho eleisaun ba Prezidénsia  Asembleia, Dr Roberto Tomas Morales Ojeda, Ministro Saúde Cuba eleitu  hanesan Prezidente foun ba asembleia ne’e.  Vise-prezidente na´in 5 husi Bahrain, Congo, Fiji, Lithuania, no Sri Lanka; no membru Komité Jerál husi Rejiaun Afrika, Amerika, Mediu Oriente, Europa no Dra. Ines T. da Silva Almeida, membru husi delegasaun Ministériu Saúde Timor-Leste, mak reprezenta membru Komité Jerál husi Rejiaun Sudeste Aziátiku.

Asembeia Mundiál Saúde ne’e atende husi delegadu Organizasaun Mundiál Saúde, reprezentatne husi estadau membru sira, delegadu husi ajensia oioin, organizasaun, fundasaun no grupu sira ne’ebé kontribui atu dezenvolve setór saúde.

Delegasaun husi Republika Demokratika Timor- Leste kompostu husi S.Exa. Dr. Sergio Gama Lobo, SpB, Ministru Saúde RDTL, Sr.Marciano da Silva, Embaixadór Timor-Leste iha Jenebra, Sr.Ivo Ireneo, Diretór Nasionál Polítika, Planeamentu no Koperasaun, Dra. Ines T. da Silva Almeida, Diretora Servisu Kontrolu  Moras, no Dr. Herculano Seixas dos Santos, Xefe Departamentu Kontrolu Moras la Hada´et no Mentál.

 Diretora Jerál OMS, Dra. Margaret Chan Iha diskursu abertura, expresa nia preokupasaun bo’ot ba iha aumentu númeru obesidade infántil iha mundu liu liu iha nasaun subdezenvolvidu sira. Tuir  relatóriu estatístiku saúde mundiál 2014 hatudu katak ita nia labarik sira  kada loron bokur ba beibeik.

Atu halo asesoramentu diak hodi hapara obesidade infántil, Dra. Chan anunsia katak estabelese ona Komisaun altu nivel ida kona ba hapara obesidade infantil. Komisaun ida ne´e sei lidera husi  Sr. Peter Gluckman, asesór sientífiku ba Primeiru Ministru  Neo Zelándia, no Dr. Sania Nishtar, fundadór  polítika Saúde Pakistanés. Ekipa ne´eprepara ona relatóriu konsensu ida ne’ebe sei sai efikaz ba kontextu oioin iha mundu no rekomendasaun sira sei aprezenta fila fali iha Asembleia Mundiál Saúde tinan oin.

Dra.Chan dezafia Asembleia Mundiál Saúde atu konsidera impaktu potensial ba saúde mundu tomak ne’ebé hatudu katak akontese mudansa signifikante ba mapa ema kiak iha mundu.70 % husi ema kiak sira mak hela iha nasaun ho ingresu médiu ho ekonómia emerjente. Nia mos alerta ba delegadu sira kona-ba importánsia atu luta hasoru mudansa klímatika, halo prevensaun no kontrolu ba moras la hada´et sira, liu liu  moras kardiovaskulár, diabetes, kankru no moras respirasaun krónika.

Timor – Leste mos partisipa iha enkontru dahuluk ba  Komite A ne’ebé loke ho diskusaun kona-ba moras hada´et. Iha enkontru ne’e Timor–Leste hamutuk ho estadu membru  husi Sudeste Aziátiku  aprova rezolusaun ida hodi apoia ba estratéjia globál foun  ba prevensaun, atensaun no kontrolu ba  moras Tuberkuloze hahu tinan 2015. Objetivu husi estratéjia ne’e mak atu hapara epidémia mundiál ba Tuberkuloze, atu hamenus númeru mate tan tuberkuloze ba 95 % no hamenus kazu foun ba 90 % iha tinan 2035. Nune’é mos defini meta provizoriu ba  tinan 2020, 2025 no 2030.

Rezolusaun ne’e bolu atensaun ba membru estadu sira atu implementa estratéjia ida ne’e ho kompromísiu nível aas no finansiamentu diak. Estratéjia ne’e fo enfaze liu ba atensaun ba populasaun ne’ebe vulnerável liu ba infesaun no dífisil asesu ba servisu saúde, hanesan emigrante sira. Estratéjia ne’e mos fo enfaze ba iha asaun multisetorál iha ámbitu protesaun sosiál, imigrasaun no justisa .

Númeru estimasaun ba ema ne’ebé moras tuberkuloze redus kada tinan. Mundu tomak iha hela dalan atu alkansa objetivu MDG hodi  hamenus infesaun ba moras tuberkuloze iha tinan 2015, maibe tuberkuloze kontinua sai hanesan moras hada´et ne’ebe hamate ema barak liu iha mundu. Iha tinan 2012, ema millaun 8,6 mak moras tuberkuloze no millaun 1,3 mak mate tan tuberkuloze no ema 450,000 mak dezenvolve TB Multidrograrezisténsia.

Iha Technical Briefing kona-ba Regulamentu Saúde Internasionál (IHR), reprezentante husi Sekretariadu OMS no estadu membru sira, inklui Timor-Leste, diskute mos kona-ba saida mak ita bele alkansa, obstáklu, inisiativu foun no kompromisu atu garantia katak mundu bele prevene, deteta no responde ba risku no seguransa  ba saúde internasionál.

Fotos

S.E. Dr. Sergio Gama Lobo,SpB, Ministru Saúde RDTL Sr.Ivo Ireneo, Diretór Nasionál PPC, Dra.Ines T. daSilva Almeida, Diretora SCD, Dr.Herculano Seixas dos Santos, Xefe Departamentu NCDCM

Bele haree foto barak liu tan iha pájina Ministériu Saúde nian iha Facebook

Textu:Dr.Herculano Seixas dos Santos
Xefe Departamentu NCDM