Sapo.tl fó formasaun ba Ekipa Komunikasaun Ministériu Saúde

Ekipa Komunikasaun Ministériu Saúde ohin hahu formasaun badak ida ho apoiu husi Gina Araújo, Xefe Projetu Sapo.tl iha Dili. Sapo.tl ne´e hanesan portál úniku ida ke fo servisu e-mail, notísia, blog, armazenamentu foto no vídeo, no barak tan ho lian tetun no portugés. Formasaun ida ne´e sei aborda tópiku sira hanesan saida mak online, oinsá ita bele uza mundu online atu fo sai informasaun.

Gina Araújo husi sapo.tl
durante sesaun formasaun

Sei diskute mós oinsá ita bele hamosu dinámika ida entre departamentu hotu hotu iha Ministériu nia laran. Dinámika ida ne´e importante tebes atu bainhira ita rekolle informasaun, bainhira trata informasaun ida ne´e hodi haree oinsa ita bele fo sai informasaun mós.

Misliza Vital, Xefe Dpt. Protokolu
no Komunikasaun, fo introdusaun
kona-ba formasaun husi sapo.tl

Ekipa tomak mós sei aprende kona-ba métodu servisu entre membru ekipa, oinsa servisu online no feramenta saida deit mak sei bele uza hodi dinámika ida ne´e moris. Bainhira formasaun ida ne´e remata, ekipa bele ona identifika kanál online sira be uza tiha ona hanesan Facebook, blog no site, nia efikásia bainhira atu hato´o informasaun.

Ministériu Saúde agradese tebes ba portál www.sapo.tl liu husi Gina Araújo nia disponibilidade mai halo formasaun ba ekipa tomak.