Aprezentasaun husi Projetu Apoiu Planu Nasionál Estratéjiku Setor Saúde

Enkontru entre Ministériu Saúde
no Parseiru sira iha Palácio das Cinzas

Horseik loron 08 Maiu 2014, Projetu Apoiu Planu Nasionál Estratéjiku Setor Saúde (PAPNESS), halo aprezentasaun kona-ba servisu durante tempu hirak ne´e.  PAPNESS ninia aprezentasaun ida ne´e atu haree se progresu durante ne´e iha susesu ka lae; realístiku ka lae atu Ministériu Saúde alkansa objetivu dezenvolvimentu ho oráriu ne´ebé estabelese tiha ona; hare fila fali sasukat husi rezultadu projetu; halo avaliasaun ba mekanismu implementasaun be iha ona no mós halo vizita servisu ba Ermera.

Ministériu Saúde hala´o mudansa sistema ne´e ho apoiu husi parseiru sira. Parseiru sira ne´e taru sira nia apoiu hodi fiar katak Ministériu Saúde bele hadian servisu tratamentu saúde iha teritóriu laran; aumenta rekuru umanu, fo finansiamentu mós ba sistema saúde no apoiu seluk tan iha servisu saúde sira seluk. Parseiru sira husi PAPNESS fiar metin iha prosesu ida ne´e tomak liu husi rezultadu ne´ebé iha, hodi nune´e sira afirma sira nia kontinuasaun apoiu iha reforma política Ministériu Saúde no Estratéjia Saúde Nasionál.

Parseiru sira destaka katak implikasaun husi mudansa servisu saúde ne´e importante, tamba hadian kualidade servisu saúde primária iha komunidade nia let. Sira mós fiar katak hodi hadian sistema ida ne´e, fasilita liu liu asesu ba ema kiak liu husi asisténsia sekundáriu.

Maibé, durante projetu ne´e tomak, iha mós obstákulu barak be mosu. Obstákulu sira hanesan fundu ba ´service delivery´no abilidade programa sira atu remata planu sira be halo tiha ona; birokrásia be sentralizadu liu mós la fo dalan atu bele la´o lais tuir nia tempu; sector farmaséutiku presiza lideransa no jestaun ida ke forte liu tan no estrutura no organizasaun impede hela ´service delivery´ ne´e ba komunidade.

Ho ida ne´e, PAPNESS mós iha pontu hirak ba konsidera  atu bele la´o ba oin. Bainhira haree fila fali atividade sira be tenki hasai ka adisiona, kansela ka aloka fundu tuir nesedidade, ka haree fila fali indikadór projetu  ba bele hetan rezultadu diak liu tan, bele ajuda reforma ne´e bé agora dadaun hala´o hodi bele hetan susesu liu tan.

@cc