S.Exa. Ministru Saúde nia diskursu ba Loron Mundiál Tuberkuloze - 2014

Respeitu ba  Diretor Saúde distritu, Adjuntu Diretor, Xefe Sentru Saúde, lider komunidade no relijiozu sira, ha´u nia kolega sira hotu husi Ministériu Saúde, profesionál saúde ( doutor,enfermeiru/a, analista, parteira, farmasista, responsável programa distritu no sub distritu) no señre/a konvidadu sira.

Ha´u sente kontente no orgulu  ohin loron iha fatin ida ne’e atu observa  selebrasaun Loron Mundiál Tuberkuloze 2014. Tuir loloos loron importante ida ne’e hala’o iha loron 24 fulan Marsu 2014, maibe muda mai ohin loron 8 fulan Maiu tamba iha razaun tékniku. Maske nune’é, ita  ida ida  presiza iha sinseridade no dedikasaun atu tau iha ita nia konsiénsia katak tuberkuloze agora dadaun sai problema saúde públiku iha Timor-Leste. Ha´u sente kontente tamba ita bo’ot  sira bele prepara hodi  selebra loron importante ida ne’e, hanesan parte husi informasaun TBC ba komunidade.

Kada tinan mundu tomak selebra loron mundial TBC iha loron  24 fulan Marsu tanba iha tinan 132  liu ba, doutor ida ho naran Robert Kock deskobre basilus kópia microbacterium tuberkuloze hanesan kauza ba moras TBC. Ba tinan ida ne’e ninian tema: Asesu ba diagnóstiku no tratamentu bele kura moras TBC ne’ebé lakon iha Rejiaun Sudeste Aziátiku.

Iha Rejiaun Sudeste Ázia ne´e, inklui Timor-Leste mós,  hetan progresu bo’ot hanesan taxa detesaun kazu, taxa susesu tratamentu atinje ona alvu global no taxa mortalidade ne´ebé hamenus. Kompara  ba 2006, hahú husi programa intrega ba Governu iha progresu barak; distritu barak mak atinje ona taxa detesaun kazu 70% no taxa susesu tratamentu 85 %. Taxa nasionál ba detesaun kazu  no taxa susesu tratamentu atinji liu ona alvu globál. Taxa mate no kotu tratamentu ba kazu TB rejistu no trata iha tinan 2012 redus tun ba 4%  maske iha difikuldade jeográfiku no kondisaun estrada.

Iha  asaun  barak ne’ebé presiza hala’o  hodi kontrola moras tuberkuloze iha Timor-Leste atu responde ba dezafiu hirak ne’ebé mensiona iha leten.  Kondisaun sosiál no dezenvolvimentu  hanesan nasaun foun, taxa transmisaun tuberkuloze sei aas iha komunidade. Kada ema Timor-oan ne’ebé iha moras tuberkuloze presiza identifika, trata no kura sira. Ida ne’e hanesan servisu bo’ot  ne’ebé sei fo impaktu pozitivu  ba dezenvolvimentu nasionál. Iha parte seluk  afeta ba ekonómia no dezenvolvimentu nasionál  tamba maioria tinan produtivu 15 - 54 mak sofre hela moras  tuberkuloze.   

Governu Timor-Leste ( Ministériu Saúde)  hetan apoiu husi doador sira iha prestasaun ba diagnoze no tratamentu disponível iha sentru saude, ospitál no mós ONG parseiru. Komunidade voluntáriu (PSF) iha SISCa  sei fasilita ita bo’ot sira  atu asesu ba  Sentru Saúde hodi hetan tratamentu no ajuda pasiente  ne’ebé hela do’ok husi fasilidade saúde hodi obzerva tratamentu (DOT) iha komunidade.

 Ha´u hanesan  Ministru Saúde, hakarak enkoraja ba ita bo’ot sira  hotu; autoridade saúde, profesionál saúde,governu lokal, lider komunidade, komunidade voluntáriu (PSF) no ema hotu hotu  ne’ebé iha fatin ida ne’e  atu fó advokasia  ba  informasaun TBC  no asegura  ita bo’ot sira nian membru uma kain, labarik,  relasaun familia, viziñu no membru komunidade  atu ba fatin tratamentu  TB ne’ebé disponível, foti ai-moruk  iha fasilidade saúde atu kura   sira husi moras TBC. Ita bo’ot sira bele ajuda mós pasiente TBC atu buka fasilidade saúde liu husi oferese DOTS ne’ebé loos no la bele diskrimina pasiente TB. Bainhira ita bo’ot kura ona ema moras TBC ida, ita bo’ot ajuda ita bo’ot nian aan-rasik, nune’é  ita sei la sofre no mate ba TBC. Karik ita bo’ot sira  la oferese  tratementu ho diak  bele aumenta transmisaun tuberkuloze iha komunidade.

Ha´u nian mensajen ikus  liu ba komunidade, karik  ita bo’ot sira iha mear liu semana 2 ka liu  bele ba iha fasilidade saúde ne’ebé besik ka ba SISCa atu konsulta. Ba sira ne’ebé agora iha tratamentu nian laran, ha´u hakarak enkoraja  ita bo’ot sira atu halo tratamentu tuir tempu  to’o hetan kura, ita bo’ot  bele sai ezemplu diak ba sira seluk  hodi kontribui ba  dezenvolvimentu nasionál no  hadia ekonómia iha uma-kain no komunidade en jeral. 

Ha´u hakarak subliña  katak TBC  moras ne’ebé bele kura  karik halo tratamentu ne’ebé regulár tuir tempu determinadu.Tamba ne’e ha´u husu Timor-oan sira  hotu atu fo liman ba malu servisu hamutuk iha  komunidade  atu funu hasoru  TBC no  bele hamenus taxa mate no moras iha Timor-Leste.

OBRIGADU BARAK