Ministériu Saúde hetan apoiu motorizada sia ho kareta minibus ida husi Care International Timor-Leste

Diretór Jerál Ministériu simu dokumentu ofisiál
husi Diretora Care International TL

29 Maiu 2014. Ministériu Saúde hetan tulun motorizada 9 (sia), kareta minibus ida  husi Care International Timor-Leste servisu hamutuk ho Uniaun Europeia.

Entretantu diretora Care International Timor-Leste, Geraldine Zwakh iha ninia intervensaun hateten katak “ apoiu motorizada no kareta ne´ebé Care International fo nee, hodi fo tulun ba programa saúde inan no labarik no mos nutrisaun. Ne´ebé sei kontinua hanesan dezafiu boot nasaun no mos liu liu ba komunidade iha Ermera”. Nia hatutan tan katak apoiu ne´ebé Care International Timor-Leste fo ne´e sei apoia barak ba distritu no mos sub-distritu sira, liu liu komunidade Ermera.

Sorin seluk Embaixadór Uniaun Europeia ba Timor-Leste hateten katak apoiu motorizada sia ho kareta ida ne´ebé Care International Timor-Leste fo ne´e hanesan mos parte ida ba apoiu komunidade rurál nebe presiza tebes atu hetan asisténsia.

Iha oras hanesan Madalena Hanjam ne´ebé hanesan mos kordenadora ba apoiu fundu Uniaun Europeia iha Timor-Leste hateten, apoiu sira ne´ebé agora dadaun fo ministériu hotu hotu ne´ebé hetan husi fundu Uniaun Europeia sira sei halo supervizaun no mos sei tau matan ba veikúlu sira ne´e.

Madalena Hanjan mos akresenta  tan katak agora dadaun Uniaun Europeia apoiu tan fundu dolar amerikanu millaun 10 ba Ministériu Saúde hodi bele fo asisténsia diak ba komunidade nune´é husu ba Ministériu Saúde atu bele servisu ho didiak hodi bele ezekuta orsamentu hirak ne´e ho efisiénsia no mos efikás.

Revista veikúlu no mos
motorizada husi Care International

Entretantu Diretór Jerál Ministeriu Saúde iha ninia intervensaun, “agradese tebes ba apoiu hirak ne´ebé Care international fo ne´e tamba bele apoiu tan ba programa saúde inan ho oan nian liu liu iha distritu Ermera." Motorizada no mos kareta sira ne´ebé Ministériu Saúde hetan husi Care International ne´e sei entrega direta ba distritu maibé sei kontrola direta no másimu husi distritu ne´ebé refere atu garante katak motorizada no mos kareta ne´ebé sira simu bele halo duni servisu ba nesidade komunidade no mos estadu nian.