Timor-Leste apoia rezolusaun kona-ba ´Hadian Emerjénsia Seguru no Kuidadu Sirúrjiku Esensiál no Anestézia´

Dr.Herculano S. Santos, reprezentante
husi Timor-Leste tur entre estadu membru
husi EUA, Austrália no Ejiptu. 19.05.2014

Delegasaun Timor-Leste ne´ebé Dr. Sergio Gama Lobo SpB. lidera halo partisipasaun ativa iha Asembleia Mundiál Saúde (AMS) iha Jenebra. AMS hanesan instituisaun supremu ba hola desizaun ba Organizasaun Saúde Mundiál (OMS). Estadu membru sira diskute hamutuk ajenda ne´ebé prepara tiha ona hodi bele determina polítika organizasaun ida ne´e. Timor-Leste hanesan mos estadu membru ida, partisipa iha diskusaun paralelu no fo apoiu ba rezolusaun husi estadu membru Zambia kona-ba ´Hadian Emerjénsia Seguru  no Kuidadu Sirúrjiku Esensiál no Anestézia' liu husi Dr. Herculano Seixas dos Santos.

Dr. Herculano Seixas dos Santos, iha eventu paralelu ne´ebé ko´alia kona-bá tratamentu siirúrjiku hanesan parte ida husi atensaun primária, no presiza atu integra iha planu nasionál saúde iha rai hotu hotu. Ho vizaun atu hamenus karga globál ba moras sirúrjika presiza tebes atu hakaas kapasidade sirúrjika, liu liu iha nível ospitál distritu, hodi nune´é bele sai hanesan meiu efisiente ida. Eventu paralelu ne´e diskute mos kona-bá apoiu ba servisu emerjénsia OMS no Programa Kuidadu Esensiál Sirúrjiku husi Departamentu Prestasaun Servisu no Seguransa.

Timor-Leste fo hanin fila fali observasaun sira be Dr. H. Mahler, ex-Diretór-Jeral ba OMS halo. Nia hanesan vizionário boot ida ba  asisténsia saúde hatete katak tratamentu sirúrjiku ba emerjénsia hotu hotu tenki hatama mós ba iha atensaun primária saúde nian. Dr. Herculano haktuir katak "Ami interpreta buat ida ne´e hanesan ne´e tamba sirúrjia ho kualidade tenki disponível mos se karik presiza, sem kualker atrazu no, ho preferénsia iha primeiru pontu tratamentu."

Rezolusaun husi Zambia ne´e, importante atu hetan konsiderasaun husi estadu membru sira seluk mos. Timor-Leste reitera atu labele ignora observasaun ida husi OMS katak " ... 11% husi karga globál moras bele hetan tratamentu ho sirurjia". Hodi nune´e, ita presiza servisu hamutuk ho forma ida ke efisiente no rentável hodi uza didiak feramenta ida ne´e. Sirurjia bele hatudu katak sei la sai karu ba halo tratamentu, liu liu iha kontestu ba ezemplu barak ne´ebé halo ho susesu ho deit para-médiku sira.

Dr. Herculano hakotu ninia observasaun katak ho experiénsia indepénsia tinan sanulu resin rua, "Ami (Timor-Leste) sinseramente apoia inisiativa husi Zámbia no rai sira seluk atu hadian emerjénsia seguru no kuidadu sirúrjiku esensiál sira".

AMS ida ne´e eventu ida ke hala´o  tinan tinan iha Jenebra. Timor-Leste hanesan estadu membru ativu ida mos marka prezensa iha ne´eba ho prezensa delegasaun ne´ebé lidera husi Dr. Sergio Lobo, Embaixador Marciano da Silva, Ivo Ireneu, Dra. Ines Almeida no Dr. Herculano S. Santos.



@CC