Timor-Leste destaka hanesan kazu susesu iha kombate kontra malária iha mundu

Kompromisu polítika makaas husi Ministériu Saúde 
konsege hamenus taxa kazu moras malária

Ohin oron 25 Abril 2014, mundu tomak selebra loron malária nian. Liu liu Timor-Leste ne´ebé hetan atensaun ba susesu programa malária husi Ministériu Saúde.

Parabens ba ekipa tomak husi Programa Nasionál ba Kontrola Malária, Ministériu Saúde nian no Espesialista sira husi Organizasaun Saúde Mundiál, iha eradikasaun moras hadaet ida ne´e.  

Ekipa husi instituisaun rua ne´e halo ona levantamentu ba densidade larva susuk nian iha bee laran no mós identifika espésia oin oin hodi bele hatene diak liu tan vetor principal sira, oinsa nia moris, hodi nune´e bele dezenvolve diak liu tan medida sira ke efikaz atu hasoru problema ida ne´e

Levantamentu sira be halo ona durante tempu ne´e hanesan parte integral ida iha medida prevensaun moras malária. Estudu sira be halo iha levantamentu ida ne´e bele haree tipu susuk, nia moris fatin, bainhira nia tata no ida ne´ebé deit mak susetivél hasoru insetisida. Rezultadu ida ne´e ajuda Ekipa Programa Malária hodi avalia abordajen ba prevensaun hasoru moras malária.

Parseiru internasionál sira mós rekoñese kompromisu polítiku makaas husi Ministériu Saúde, ne´ebé halo avansu bo´ot iha prevensaun no kontrola malária iha tinan hirak ikus mai. Iha fatin fatin ne´ebé iha risku aas ba malária hetan mós medida ba kontrola no prevensaun. Instalasaun saúde pública hotu hotu iha ekipamentu ba halo diagnostiku no trata moras ida ne´e.

Dadus sira hatudu katak iha tinan 6 nia laran Timor-Leste konsege hamenus kazu malária husi 220 ba kada ema na´in 1000 iha tinan 2006 ba deit kazu 1 ba kada ema na´in 1000 iha 2013.

Ministériu Saúde iha loron ida ne´e mós renova fila fali kompromisu polítiku iha kontinuasaun investimentu ba prevensaun no kontrolu malária. 

Bele haree mós site Organizasaun Saúde Mundiál (ho inglés)