Enfermeiru balun iha HNGV ladun servisu di’ak

Diretór ezekutivu hosi Hospitál Nasionál Guido Valadares (HNGV) José António Gusmão Guterres rekoñese katak enfermeiru balun maka ladun fó atendimentu di’ak ba pasiente sira, tuir regra ne’ebé iha, fó sai jornál Suara Timor Lorosa’e. 

“HNGV sei kria mekanismu ida hodi kontrola hahalok hosi enfermeiru nomós sei fó formasaun lolos ba sira”, fó sai diretór ne’e hafoin halo parte iha serimónia inaugurasaun hosi sala VIP ka sala emerjénsia espesiál no sala konsulta médika preventive (medical check up). 

José António Gusmão Guterres hatutan tan katak pasiente hirak ne’ebé lahetan tratamentu di’ak hosi parte enfermeiru sira bele hato’o keixa ba diretór hospital nian atu nune’e bele bolu atensaun ba sira, hodi koriji hahalok refere. 

Ospitál iha regra hodi regula hahalok refere. Karik enfermeiru ka médiku balun maka hatudu hahalok ladi’ak, pasiente sir abele hakerek naran hosi ema hirak ne’e no hato’o keixa. 

Diretór ne’e hatene katak kazu ne’e iha duni, tanba enfermeiru balun abandona hela pasiente sira no hatutan tan katak tuir lolos hahalok ne’e labele iha, tanba ne’e presija fó formasaun kona-ba komportamentu no atitude enfermeiru nian ba pasiente sira. 

Ministru Saúde Sérgio Lobo iha ninia diskursu husu ba enfermeiru sira atu hatudu hahalok di’ak bainhira atende pasiente sira, maski hatene katak kondisaun ospitál nia laduk di’ak, ezemplu maski sala nakonu ho ran. 

Deputadu Eládio Faculto hosi bankada Fretilin dehan katak sira sempre halo lamentasaun relasiona kestaun kona-ba atitude hosi pesoál saúde nian iha ospitál, tanba ladun iha profesionalismu, tanba ne’e nia husu ba enfermeiru sira atu fó atendimentu di’ak ba apsiente hothotu. 

Rotário de Jesus, hanesan família pasiente nian iha ospitál refere lamenta tebtebes ho hahalok hosi enfermeiru balun ne’ebé ladun fó atendimentu di’ak ba ninia família. 

SAPO TL ho STL 



Ligasaun ba notísia:
http://noticias.sapo.tl/tetum/info/artigo/1415001.html