Komunikadu Imprensa

Timor-Leste manan Prémiu Exelénsia iha Saúde Públika iha Rejiaun Sudeste Aziátiku

Dili, 03 Setembru 2014  -  Organizasaun Mundial Saúde ba Rejiaun Sudeste-Aziátika (WHO-SEARO ho sigla inglés) premia Timor-Leste nia Programa Nasionál ba Kontrola Malária ho ´Prémiu exelénsia iha saúde públika iha rejiaun´. OMS estabelese prémiu ida ne´e hodi rekoñese lideransa no realizasaun excepsionál ne´ebé Timor-Leste hanesan estadu membru OMS-SEARO hatudu hanesan implementadór ho rezultadu excelente.

Redusaun insidénsia kazu
malária iha Timor-Leste

Husi insidénsia malária 97% iha tinan 2006 ka katak kazu 223,002 (insidénsia 223/1000 abitante) tun ba 1,042 tinan 2013 (<1/1000 habitante). Susesu ida ne´e rezulta husi introdusaun monovalent RDT iha 2008 no bivalent RDT iha 2010 to´o agora ba fasilidade saúde iha teritóriu tomak. Ho lideransa foun hahú troka Guia Nasionál ba Tratamentu Malária,hanesan uzu ai-moruk ´Fansidar´ ba ´Terapia Kombinada Artemether´ ka koñesidu hanesan ´Arthemeter Conbination Therapy (ACT)´ iha tinan 2007 hatudu taxa redusaun malaria husi 33% ba 42% .

Ministériu Saúde iha tinan 2008 mós hahu halo teste iha fasilidade saúde hotu hotu atu ema ne´ebé deit mak suspeita iha moras malária tenki halo teste malária molok atu simu tratamentu. Ka katak fasilidade saúde sira sei la halo tratamentu bazeia ba sintoma malária.

Kada membru família na´in rua
simu muskiteiru ida

Distribuisaun muskiteiru ba inan isin-rua iha fasilidade saúde liu husi ANC no mós distribuisaun muskiteiru ba 80% populasaun ne´ebé hela iha área risku ba malária.

Pulverizasaun (ka Indoor Residual Spraying) ba uma kain iha distritu 5 ne´ebé iha risku bo´ot ba malária hanesan Covalima, Dili, Lautem, Manatuto, Manufahi no mós Viqueque.

Tékniku saúde sira halo verifikasaun ba slide malária

Ministériu Saúde estabelese mós Unidade Kontrolu Kualidade Mikroskópia Malária iha Laboratóriu Nasionál. Unidade ida ne´e harii hodi halo atividade verifikasaun ba slide malária ne´ebé rutina. Ho ida ne´e fasilita mós téniku internasionál OMS nian sira atu bele apoia no garante kontrolu kualidade.

Iha nível hotu hotu (nasionál to’o sub-distritu) iha responsável ba Programa Malária hodi garante implementasaun programa kontrola moras ne´e iha teritóriu tomak. 

Susesu iha redusaun insidénsia malária ne´e mós konta ho apoiu orsamentu másimu husi GFATM (Fundo Global), Asisténsia Téniku husi OMS, liu liu husi kompromisu nasional Programa Malária iha nível hotu hotu.

Méritu ne´ebé Ministériu Saúde no ekipa Programa Nasionál ba Kontrola Malária hetan husi OMS sei simu ho partisipasaun Ministru Saúde, Dr. Sergio G.C. Lobo, SpB, iha Sesaun ba dala Nen Nulu Resin Hitu ba ´Reuniaun Ministru Organizasaun Mundiál Saúde no Organizasaun Saúde ba Rejiaun Sudeste-Aziátika (WHO-SEARO)´, iha Dhaka, Bangladesh iha  loron 10 fulan Setembru.  

Bainhira simu karta husi Diretora Rejionál OMS, Ministru Saúde Dr. Sergio Lobo kongratula imidiatamente ekipa saúde públika no Fundu Global responsável ba implementasaun programa nasionál kontrola malária. Tuir Ministru Saúde, rezultadu ida ne’e hanesan esforsu hosi Governu atu hadia kondisaun vida Timor-oan…”Premiu ne’e husi no ba Timor-oan hotu”.

REMATA.

_

_______________________________ 

Ba informasaun seluk favor kontakta:

Para mais informações, contacte:

Misliza Vital, Chefe de Gabinete de Protocolo e Comunicação

Ministério da Saúde

Tel.: (+670)78179126; Email: mis-vital29@yahoo.com