Preparasaun pandemia Ébola iha Timor-Leste

Entidade hotu hotu iha Ministériu Saúde
diskute kona-ba preparasaun no vijilánsia moras Ébola

Ministériu Saúde hahú husi 22 Agostu 2014 halo Ekipa Vijilánsia ida hodi halo preparasaun ba Moras Ébola ne´ebé agora dadaun sai pandémiku iha Siera Leoa, Guiné, Liberia no seluk tan.Preparasaun ida ne´e halo ho partisipasaun husi entidade hotu hotu iha Ministériu Saúde hanesan sira husi Ospitál Nasionál Guido Valadares, Laboratóriu Nasionál, Laboratóriu Ospital Nasionál Guido Valadares, Klínika Ospitál, Servisu Saúde Distritu Dili, Departamentu Moras Hada´et, Departamentu Promosaun Saúde, Departamentu Sistema Informasuan, Departamentu Saúde Ambientál, Departamentu Nutrisaun, Bank Raan, Farmásia, SAMES  no Organizasaun Saúde Mundiál.

Kada departamentu ohin halo update ba preparasaun saida deit mak sira halo ona se karik moras ne´e tama mai Timor-Leste oinsa mak atu hatan ba. Profesionál saúde sira ho kuidadu trasa planu peprasaun ida ne´e hodi labele halo populasaun hakfodak tamba moras ida ne´e ninia taxa sobrevivénsia 47% deit. Alerta fo liu liu ba duni profesionál saúde sira rasik ne´ebé hetan risku aas liu atu hetan moras ida ne´e.


Ministériu Saúde sei servisu hamutuk ho rai viziñu Indonézia hodi bele haruka espesialista ida atu mai halo treinamentu ba halo refreshing fila fali saida mak sira uluk halo tiha ona. Ida ne´e hanesan forma baebaen ida hodi bele fó apoiu ba malu no aprende husi experiénsia rai seluk kona-ba preparasaun moras hada´et ida ne´e.


Hahu husi pontu entrada sira hanesan portu aereu, portu ró nian, no fronteira, hotu hotu sei iha kartaun kestionáriu ida. Kestionáriu ne´e husu kona-ba ema ne´ebé tama ne´e karik liu husi rai sira ne´ebé iha ona moras Ébola ka iha membru família ne´ebé mak viaja ba ona rai ho pandemia Ébola sira. Informasaun mos sei fo sai liu husi rádio, televizaun, no kartaz iha fatin públiku sira. 


Profesionál saúde sira iha reuniaun ida ne´e, hatete katak sira preparadu atu halo jestaun ba ema ne´ebé hetan moras Ébola tama mai Timor-Leste maske ho risku aas. Sei iha área balun mak sei presiza apoiu maibé ho apoiu, experiénsia no matenek husi Organizasaun Saúde Mundiál no rai viziñu sira Timor-Leste bele hatan.

Timor-Leste mos sai hanesan Estadu Membru ba Regulamentu Internasionál Saúde 2005 (IHR 2005 ho sigla inglés), ne´ebé hanesan regulamentu ne´ebé kesi legalmente ho objetivu atu fo apou ba rai sira atu servisu hamutuk hodi salva moris no forma moris ema hotu hotu nian husi  ameasa propagasaun moras no risku saúde sira seluk. Regulamentu ida ne´e mos kesi atu bele evita interferénsia sira ne´ebé la presiza ho komérsiu no viajen internasionál sira. Rai membru hotu hotu tenki iha ka tenki dezenvolve kapasidade núkleu mínimu ba saúde públika hodi bele implementa IHR 2005. Akordu ida ne´e kontribui tebes ba seguransa saúde públiku hodi bele fo enkuadramentu foun ba koordenasaun ba jestaun eventu sira ne´ebé ke bele konstitui hanesan emerjénsia iha saúde públika, hodi bele hadian kapasidade rai hotu hotu atu deteta, evalua, notifika no hatan ba ameasa saúde públika. 



@cc