Loron Mundiál ba Katuas no Ferik sira

Katuas sira iha Atsabe
Foto@cc

Dia 01 Outubru ita komemora Loron Internasionál ba Katus no ferik sira. Loron ida ne´e mosu iha Asembleia Mundiál kona-ba sai katuas-ferik, ne´ebé Organizasaun Nasaun Unida promove iha 1982 iha Viena, Austria ne´ebá. Ninia objetivu hakarak atu kualidade vida ma sira ne´ebé katuas no ferik liu husi saúde no integrasaun sosiál.

Saúde ba ema idazu sira importante tebes, tamba ho númeru ferik no katuas sira ne´ebé aumenta tinan tinan. Iha Timor-Leste tuir sensu ne´ebé realiza iha  2010, revela katak, husi totál populasaun milliaun 1,08,  8%  ka na´in 87 567 mak iha ona otas 65 ba laten (rasio 45.328 ka 51, 7% ferik no  42.239 ka 49, 3% katuas). Sai katuas no ferik rezulta iha diminuisaun mortalidade, no importante liu fertilidade iha deklíniu. Maibé prevalénsia ba moras la hada´et no defisiénsia aumenta. 

Iha Ministériu Saúde iha Departamentu ida mak toma kota ba sa´ude populasaun idozu sira. departamentu ida ne´e iha Departamentu Moras La Hada´et nia okos. Maske iha ona programa ida iha divizaun prestasaun asisténsia iha área promosaun saúde, prevensaun moras, tratamentu moras no reabilitasaun ba idozu sira iha nível aldeia, servisu idozu liu husi SISCa (Serviços de Saúde Comunitária Integrada), komunidade sei presiza nafatin atu hatene liu tan kona-ba existénsia idozu sira no problema saúde sira ne´e relasionadu. 

Liu husi Loron Internasionál Katuas no Ferik ida ne´e mai ita hotu sensibiliza-aan no hamosu liu tan konsiénsia ba membru komunidade terseira idade sira ba nesesidade ka kuidadu espesiál be sira presiza, liu liu hahú iha ita ida ida nia uma laran. 

Atu ita bele sai ferik no katuas ho saúde diak durante ita-nia vida tomak ita tenki:

• Pratika desportu tuir ita-nia kapasidade fizíka
• Manten alimentasaun saudável no ho kualidade
• Partisipa iha programa integrasaun sosiál
• Manten relasionamentu saudável ho ema seluk tinan hanesan ho ita
• Dezenvolve atividade produtivu

Dala barak ita haluha no hatudu hahalok ho stigma katak katuas no ferik sira la iha ona valór ba sosiedade. Ita tenki atensaun nafatin atu sira la bele sente hanesan ne´e no hadook sira sira husi dezanimu no depresaun. Sosiedade hanesan ida deit tenki trata ema idozu sira ho konsiderasaun no tamba sira iha experiénsia vida, respeitu ida ne´e fundamentál tebes ba sira-nia estabilidade emosionál.

      

@cc