Enkontru Ministru ho Diretor Ministériu Saúde sira

Horseik, loron 18.03.14 Ministru Saúde hala´o reuniaun ho Vise-Ministra GAR, DJ, Diretor Nasionál sira, Diretor Ezekutivu sira, no Diretor Saúde Distritál sira atu ko´alia kona-ba diskusaun plenária iha Parlamentu Nasionál (PN) ne´ebé halo hodi bainrua liu bá, loron 17.03.14. Ministru Saúde fó hanoin ba Diretor sira hotu katak preokupasaun sira ne´ebé membru PN hato´o ne´e, deskreve duni situasaun real ne´ebé mosu lorloron iha área servisu barak Ministériu Saúde-nian; tan ne´e Ministru Saúde husu ba Diretor sira atu esforsa-aan, orienta estrutura iha sira-nia okos atu halo prestasaun servisu diak.

Ministru fo hanoin ba Diretór sira katak problema ne´ebé Média no Parlamentu Nasionál foti durante ne´e bele dehan katak problema sira ne´ebé menus husi US$100, katak problema ne´ebé kada Diretor bele rezolve ho osan adiantamentu ne´ebé sira simu kada fulan. Kada Diretor tenki dezenvolve kapasidade institusionál iha nia estrutura atu:

• Bele reastreia buat ne´ebé akontese ka hala´o tiha ona
• Organiza atividade lorloron nian didiak atu hatan ejizensia korente
• Planeia didiak atividade futuru bazeia ba dezempeñu ne´ebé hetan no meta ne´ebé trasa tiha ona iha PEDN, PEDSS, Programa V Governu Konstitusionál, desizaun husi Konsellu Diresaun no Konsellu Konsultivu Ministériu Saúde, no diploma sira no sirkular sira ne´ebé Ministru fó sai

Enkontru remata ho diskusaun klean kona-ba kestaun hotu hotu ne´ebé parlamentáriu sira foti durante sesaun Plenária, iha ne´ebé partisipante sira hotu analiza kada problema, sujere solusaun no pasu ne´ebé estrutura tomak Ministeriu Saúde tenki la´o atu iha kordenasaun diak liu.