Semináriu Badak kona-ba Étika ba Profesionál Saúde sira

Profeionál saúde sira iha diskusaun
 kona-ba étika, 27.03.2014

Departamentu Étika no Kontrolu Kualidade horseik (27.03.2014) halo semináriu ba profesionál saúde sira iha Ospitál Nasionál Guido Valadares. Semináriu badak ida ne´e hato´o husi Prof. Dr. Mario Antonio Sanches husi Pontificia Universidade Católica do Paraná, Brasil.

Tuir Prof. Sanches hatutan katak área étika ne´e área ida ke importante tebes ba profesionál saúde sira atu tur no diskute klean liu tan. Timor-Leste to´o ohin loron seidauk iha Komisaun Étika ida ba Profesionál Saúde sira nian. Hahu husi lideransa Dr. Sergio Lobo, tinan ida liu ba Ministériu Saúde loke tan Diresaun ida hodi tau matan ba loos deit área ida ne´e, ho xefia husi Dr. Irene de Carvalho.

Diskusaun ida ne´e ko´alia kona-ba morál, étika, direitu, deontolójia no mós bioétika. Imperativu tebes atu Timor-Leste halo debate barak liu tan liu liu ho avansu teknolójia barak ne´ebé iha mundu ohin loron nian.

Profesionál saúde sira tenki hatene halo desizaun ida be loos iha momentu be presiza. Iha situasaun difísil lubun ida mak médiku no enfermeiru sira enfrenta iha sira-nia servisu lorloron. Nune´é duni presiza atu tuur hamutuk no ko´alia kona-ba Kódigu Étika ba médiku no enfermeiru sira no mós profisaun sira seluk bé existe iha Ospitál Nasionál Guido Valadares.

Partisipante sira hotu diskute kona-bá valorizasaun ba direitu pasiente no ninia autonomia, se mak deside kona-ba tratamentu ida no oinsa informa ba familia ka pasiente sira rasik. Buat sira ne´e hotu tenki tetu ho moral, kultura, relijiaun, lei no buat barak tan tuir ida ida nian. Ho diversidade ida ne´e, Kódigu Étika tenki buka meiu ba hetan debate barak liu tan no hetan legalizasaun.



@CC